Welcome, Guest. Please login or register.
April 17, 2014, 08:48:13 AM
Home Help Search Calendar Login Register
News: SMF - Just Installed!

+  smkengkilili.com
|-+  Subjects
| |-+  Elective Subject
| | |-+  B.Iban
| | | |-+  Panitia B.Iban
| | | | |-+  Aram kita bekunsi penemu!
0 Members and 1 Guest are viewing this topic. « previous next »
Pages: [1] Go Down Print
Author Topic: Aram kita bekunsi penemu!  (Read 1046 times)
Cikgu John
Teacher SMKE
Jr. Member
*
Offline Offline

Posts: 55



View Profile Email
« on: January 23, 2010, 07:49:15 AM »

Aram kita bekunsi penemu!
Penambah, jaku penyambung tauka jaku penempat?

Ba senentang pansik grama jaku Iban (jalai jaku) aku nguna chara pansik banding (pendekatan perbandingan) aku nguna – Tatabasa Bahasa Melayu – English  Grammar – Jalai Jaku (grama) Iban.   


Sekali tu aku bekunsi penemu enggau bala penulis & penguna Jaku Iban ba pekara ti nyau deka penambah ‘ ke, ke.., di…, di,  enggau se…’.   


A. Guna penambah ‘ke…’, jaku penyambung ‘ke’,  enggau  jaku penempat ‘ke’

Tiga iti pekara tu suah nyadi pun kelikuh mensia mayuh, lebih agi bala penguna Jaku Iban. Sida ti semina nguna iya dikena bejaku aja, nadai tentu penanggul, laban munyi tiga iti komponen jalai jaku tu sama aja. Tang penguna jaku Iban baka penulis, patut nemu bida guna tiga iti pekara di atas nya. Enti iya salah sepil sereta mega salah guna dalam ayat, iya tau ngerusak teks ke ditulis orang nya. Nya alai, penulis patut mansik sereta patut meretika konsep iya. Dini alai tempat tiga pekara nya diguna nyadi penambah, jaku penyambung, tauka  jaku penempat?
               
1.Guna enggau reti ‘penambah ke…’   
   Penambah ‘ke…’  (imbuhan awalan ke...) diguna nyadi penambah ba pun jaku lalu mesti
   disepil bejantil enggau leka jaku ti nguna iya. Penambah tu suah dikena ngaga jaku tiap
   ordinal baka ba chunto ayat di baruh tu.
     
     a.  Niel Amstrong nya mensia ti keterubah sangkai ba bulan. 
     b.  Sehari tu kedua kali Tora enda datai ke sekula.
     c.  Pengerami Hari Meredeka Ke-49 diintu di Kuching.
   
  2. Guna ‘ke’ nyadi jaku penyambung (kata hubung)
       Lebuh diguna nyadi jaku  penyambung selit relatif, ‘ke’ tu sama reti enggau jaku ‘ti’
       dalam ayat jaku Iban. Iya mega sama enggau reti ‘yang’ dalam Bahasa Melayu.
     
      a.  Anak mit ke pandai bejaku nya, anak Pengulu Dana.     
      b.  Bas ke ditepan kami nya, enda ngetu ba Bintulu.   
     
3.  ke   (penempat, sendi nama)
     Lebuh diguna nyadi jaku penempat  ‘ke’  tu sama reti enggau leka jaku ngagai dalam
     ayat jaku Iban. Iya enda disepil bejantil enggau leka jaku ti guna iya. Peratika guna iya
     dalam ayat di baruh tu.   
               
      a.  Kami ke  Kuala Lumpur kemari. (RJN + RJPt) 
      b.  Kerita kami limpang ke kanan.   (penembu rambai jaku pengawa intransitif)
      b.  Aming terejun ke dalam sungai. (penerang tempat rambai jaku pengawa intransitif) 
      c.  Ukai baka ke muai empeleman. (penerang rambai jaku pengawa intransitif)   
      d. Kami deka diau ditu sampai ke jemah ila. (penembu rambai jaku pengawa intransitif)
      e. Sida nganti dia ari pukul 8.00 pagi datai ke pukul 3.00 lemai. (penerang maya rambai jaku
           pengawa intransitif)

      Jaku penempat ‘ke’ kekadang sama guna sereta reti enggau ‘sendi nama / kata hubung: untuk,
      sebagai, akan, pada, bagi, demi, seperti, agar, supaya   dalam Bahasa Melayu. Peratika
      chunto guna leka jaku nya dalam ayat di baruh tu.   
     
       f. Indai Endu meli bup novel ke anak iya. (untuk)
       g. Dagin manuk manah ke pemakai anak mit.(untuk)
       h. Pengelandik Melisa tau ambi ke chunto nembiak bukai. (sebagai, bagi)
       i. Semua indai sayau amat ke anak sida.(akan)
       j. Raja Patin patut ngambi  anak indu Raja Tapah ke bini iya. (sebagai)
       k. Aku asai ke dimbi mimpi, betemu enggau nuan. (seperti)   
       l. Letup berechun nyin, munyi ke ngerendai. (seperti)
       m. Ukai baka ke muai empeleman. (seperti)   
       n. Nembiak sekula patut rajin belajar ambi ke ulih masuk universiti. (supaya)
       o. Kitai Iban patut beserakup awak ke kitai ulih maju baka bansa bukai. (agar)         

B. Guna enggau reti ‘penempat ‘di’  & penambah ‘di…’ dalam ayat jaku Iban
     
     1. Jaku penempat ‘di’ sebaka reti sereta guna enggau jaku penempat ‘ba’. Iya enda disepil   
   bejantil enggau jaku adap tauka jaku nama ti entudi iya. Peratika chunto ayat di baruh tu.
a. Kami sebilik diau di Batu Kawa, Kuching.
b. Bup nya disimpan apai di dalam bilik kebal.   

2. Penambah pun  ‘di…’ (awalan di…’)       
    Penambah ‘di…’ diguna kena ngaga jaku pengawa transitif dalam ayat pasif. Nya alai iya
    mesti disepil bejantil.
a. Kasut nya dibeli Peter ba kedai Wong Meng San.
b. Pun rian nya ditanam Ini Andan.

3. Penambah ‘di…’ mega diguna begulai enggau penambah ‘…ka’ lalu nyadi penambah bekepit baka:  di…ka,  dike…ka, dipe…ka, diper…ka. Penambah tu mega dikena ngaga jaku pengawa transitif dalam ayat pasif. Pekara ti patut dikeingatka penulis nya, semua
    penambah patut ditulis bejantil enggau leka jaku ti nguna iya. Peratika chunto guna
    penambah bekepit nya dalam ayat di baru tu.
           a.  Jalai nya sigi diawakka sida ditujah bala mayuh.
           b.  Jawai dikerinduka semua pengajar ba sekula iya.
           c.  Orang ke dipebasaka kitai agi peremisi di menua tasik.
           d.  Tikai bemban nya endang senjaga diperujanka indai Lipai di tanju.


C.  Guna penambah ‘se…’ dalam ayat.
Dalam ayat jaku Iban penambah ‘se…’ ngembuan lima guna (fungsi) enggau reti iya. (Harry, Mawas, 2005, Tatabahasa Bahasa Iban, 2005: 87). Pansik sereta peratika guna nya dalam ayat-ayat di baru tu.

1. se… (penambah nunjukka reti sama tauka saum) 
          Penambah ‘se…’ diguna ba jaku nama ti nunjukka reti sama tauka saum baka ti
          ditunjukka di dalam ayat di baruh tu.     

a.   Edwin enggau Peter duduk semija di sekula.
b.   Libau agi sebilik enggau apai indai iya.
     
    2. se… (penambah nunjukka reti makin tauka betambah)
          Penambah ‘se…’ diguna ba jaku adjektif ti nunjukka reti betambah, makin tauka
          majak baka ti ditunjukka dalam ayat di baruh tu.

a.   Ai sungai nya mansang dalam-sedalam
b.    Taja Aki Manang udah tuai, pikir iya pintar-sepintar.   

    3. se… (penambah nunjukka reti sukat)
           Lebuh penambah ‘se…’ betemu enggau leka jaku ti udah nerima penambah ‘pem…,
           pen…, peng…, penge… tauka peny…‘ iya nunjukka reti sukat kualiti tauka kuantiti
           enggau seraka tempat. Peratika guna iya dalam ayat di baruh tu.   

a.   Rumah panjai kami sepemeda ari jalai alun. (seraka tempat)
b.   Pemesai batang kau nya sepemerap apai aku. (sukat kuantiti)
c.   Beras ti dibeli Endun nya semina sepemanduk aja. (sukat kuantiti) 
           d.   Sida ngereja pengawa nya sepengelengkas ti ulih sida. (sukat kuantiti)                 
           e.   Empanyat belanda ngelingi pegung sepenyuah ulih iya, nadai tatak.(sukat kuantiti)

     4. se… (penambah nunjukka reti udah)
           Kekadang lebuh penambah ‘se…’ betemu enggau leka jaku ti udah nerima penambah
           ‘peng…,’ iya nunjukka reti udah.   

a.   Sepengudah program nya tembu, kami pan sama-sama pulai ke rumah.
b.   Sepengabis tembu pengawa tu legi, baru kitai ulih ngetu belelak.   

      5. se… (penambah nunjukka reti tunggal tauka satu)
          Lebuh penambah ‘se…’ diguna ba jaku tiap tauka pengenap tesa iya mai reti
          tunggal tauka satu. Peratika rintai jaku tiap kardinal enggau pengenap tesa ti nguna
          penambah ‘se…’ di baruh tu.       

          hari –  sehari             kali – sekali          belas -  sebelas              tengah -  setengah     
          baris – sebaris          buah – sebuah      raban - seraban            butul   -  sebutul
             
          udat  -  seudat          igi –  seigi             ikat –  seikat                  leka - seleka             
          uyut – seuyut           iti  –  seiti              iku  -   seiku                   irun -  seirun                       
         
a.   Sehari sebedau nurun, sida baum mai seuyut beras seiku.
b.   Sebelas iku sida ke bebadi ba jalai raya idup magang.   
c.   Ini Manang meli seudat ai manyi ari Ini Andan.
d.   Seigi tanjau lama nya sigi mar rega, laban iya barang pesaka.
e.   Siti Noraini Bt. Abdullah bisi nganjung seiti artikel ngagai majalah Pegari.
           f.    Apai Umang meli seikat buah kemanti ari Indai Lipai.   
           g.   Kami sebilik bisi nyediaka seirun ai tuak dikena nyambut Gawai Dayak taun tu. 

Lima iti guna ‘se…’ nya endang nyadi penambah memagang. Nya alai, iya mesti ditulis
bejantil enggau leka jaku ti nguna iya baka di atas nya tadi. Diatu agi mayuh penulis Iban
enda tentu ngemeratka penambah ‘se…’ lebuh nguna iya ba pengenap tesa; iku, iti, igi, lalu
disepil baka tu: siku, siti, sigi, bejantilka penambah enggau leka jaku nya.  Reti nya
penambah ‘se...’ dibuai ‘e’.

               Naka kediatu, nadai atur ti nyebut, lebuh penambah ‘se…’               betemu enggau vocal ‘i’ , urup  ‘e’ nya dibuai. Dalam atur Bahasa Melayu enti penambah ‘se…’ betemu enggau urup vokal ‘o’ ba leka jaku ‘orang’ nyadi ‘sorang’, nya dikira salah ba atur Tatabahasa Melayu. (Mohd. Hj. Amin Arshad, Falkulti Bahasa Moden, UPM, 2006).

Tegal  ‘…ka,  ka,  ke…, ke, di,  di… enggau se…‘ ti ngembuan mayuh guna enggau reti, engka nya kebuah sekeda penulis suah saru guna, kini? Tang, penulis ti ngembuan chukup penemu ba   
grama jaku Iban (tatabahasa), lebih agi dalam aspek morfologi enggau sintaksis patut enda mudah saru nguna 7 pekara di atas nya.       

Ngena simpul pandak, penambah ‘…ka’ enda ulih bediri kediri. Iya mesti disepil bejantil enggau jaku bukai lalu diguna nyadi penambah. Sinkof  ‘ka’ ti datai ari jaku ‘deka’ semina diguna dalam karya kreatif aja (leka main, novel, jerpan). Guna iya semina 2 bengkah aja, iya nya nyadi urup penambah & sinkof.  Penambah ‘…ka’ semina diguna kena ngaga leka jaku pengawa transitif dalam jaku Iban.
        
     Penambah ‘ke…’ semina dikena ba leka jaku tiap ordinal. Tang leka jaku ‘ke’ ulih
     diguna nyadi jaku penempat enggau jaku penyambung.   
     
     Penambah ‘di…’ semina ulih dikena kena ngaga jaku pengawa transitif dalam ayat
     pasif. Tang leka jaku  ‘di’ semina ulih nyadi jaku penempat lalu enda ulih bejantil
     enggau leka jaku bukai. 
             
     Pia mega ‘se…’ semina diguna nyadi penambah lalu patut ditulis bejantil enggau leka
     jaku ti guna iya, nitihka atur nyepil leka jaku ti bepenambah mega.   
   
     Nya alai semina  ‘…ka,  ke…, di…, se…’ ti diguna nyadi penambah lalu patut besambung
     enggau leka jaku ti nguna iya.

Taja pia, enti sekeda penulis ke empai mansik dalam-dalam sereta agi mar amat deka berubah (rejects changes) lalu agi nguna stail lama, ‘siku, siti, sigi’ dikena ba pengenap tesa (kena niap) nya, nadai ga ngawa. Laban penulis ti suah mansik sereta dalam penemu ba aspek morfologi sigi nguna sepil: ‘seiti, seigi, seiku’ tegal ti enggai ngelaban prinsip morfologi (penambah). Pia mega, penulis ke udah lama nguna sepil : ‘siti, sigi, siku’ nya udah masai nguna iya. Engka bisi kebuah bukai, kini? Nadai nanggul, ulih guna kedua-dua meh nya. 
             
Aku empu dalam asil tulis (karya) Iban aku sigi nguna sepil : seiti, seigi, seiku. Ukai tegal aku enggau alah kelikuh laban orang bukai, tegal aku enggau ngelaban prinsip morfologi (penambah). Pia mega tiap-tiap penulis sigi bisi stail enggau prinsip kediri empu, baka nya mega aku. Aku enda mejal penulis bukai nitihka chara aku, enti kita nitihka chara aku, terima kasih. Enti kita enda nitih lalau agi nguna sepil ‘‘siti, sigi, siku” aku mega enda mantah, enda mega ngumbai enggi kita nya salah, laban iya sepil tauka chara nya tau dikumbai lebas (exceptional case). Pia mega, aku arapka kita ke enggai nitihka aku nguna sepil chara morfologi ‘seiti, seigi, seiku’ enda ngumbai enggai aku salah.
Logged
Pages: [1] Go Up Print 
« previous next »
Jump to:  


Login with username, password and session length

Powered by MySQL Powered by PHP Powered by SMF 1.1.17 | SMF © 2006-2008, Simple Machines Valid XHTML 1.0! Valid CSS!